कहां गइला रजऊ

(शहीदों को श्रद्धांजलि)

जिन्‍दगी बेहाल भइल, कहां गइला रजऊ¹

छिप गइला जाके कहां, अइला नाही रजऊ

तू त कहत रहला, जिन्‍दगी भर साथ बा

छोड़ के तू चल गइला, का भइल रजऊ

जिन्‍दगी बेहाल भइल, कहां गइला रजऊ।

ना भावे चूड़ी हमके, ना भावे टिकुली²

ना ही अच्‍छी लागे रतियां³, ना ही चंदनिया⁴

दिल में कसक उठे, ख्‍वाब भइला रजऊ

छोड़ के तू चल गइला, का भइल रजऊ

जिन्‍दगी बेहाल भइल, कहां गइला रजऊ।

खेतवा में लागे न मन, गांव जवरिया⁵

सूनी-सूनी लागे हमके सगरी डहरिया⁶

दुनिया बेकार भइल, तोहरे बिना रजऊ

छोड़ के तू चल गइला, का भइल रजऊ

जिन्‍दगी बेहाल भइल, कहां गइला रजऊ।

न भावे चूल्‍हा हमके, न भावे चौउका⁷

न भूख प्‍यास लागे, नाही लागे निंदिया

तड़फे मछरिया⁸ जैसे, जल बिन रजऊ

छोड़ के तू चल गइला, का भइल रजऊ

जिन्‍दगी बेहाल भइल, कहां गइला रजऊ।

केकरा⁹ से दूख आपन, कहीं हम रजऊ

सब जग उदास भइल, तोहरे बिना रजऊ

कैसे बिताईं जिन्‍दगी, तोहरे बिना रजऊ

छोड़ के तू चल गइला, का भइल रजऊ

जिन्‍दगी बेहाल भइल, कहां गइला रजऊ।

आवे का वादा करके, गइल रहला रजऊ

अपने देस की खातिर, शहीद भइला रजऊ

अब न कोई भेजी हमके, चिट्ठी-पतरिया

छोड़ के तू चल गइला, का भइल रजऊ

जिन्‍दगी बेहाल भइल, कहां गइला रजऊ।।

(1. रजऊ = प्‍यार से पति को कहते हैं, 2. बिंदी, 3. रात, 4. चांदनी, 5. इलाका, 6. रास्‍ता,       7. रसोई, 8. मछली, 9. किस से।)

© सर्वाधिकार सुरक्षित। लेखक की उचित अनुमति के बिना, आप इस रचना का उपयोग नहीं कर सकते।